El señor, sentáu y cola vista aparentemente perdía pente los desconocíos, nun yera quien pa creyer lo que veía: de sutrucu, aquella señora qu’entrare en metro llarimando per unos güeyos enllutaos de rimmel  arrimárase reculando al home que, solo cinco minutos enantes, recibiera de mano de la tala muyer una colosal ñoclada que lu dexare mirando pa Mieres (al tiempu qu’ella-y arrefundiaba un «¡gochu!»). ¡Y agora casi que–y metía’l culu na regaza! Yera increyible.

«Próxima estación: Fontana»

La muyer esfungarataba, con más y más estrueldu cada vegada. El tren paró. De sópitu ella viró 180 graos, miró a l’home con güeyos hómedos y espetó-y un besu metanes el focicu. Ensin mediar pallabra tornóse de nuevo y salió escapao pela puerta que daquién abriera.

Y el gochu sorrió como un nenu en recibiendo un regalu inesperáu.